فى ظل حالة الجدل الدائر بين مصر وإيطاليا على مقتل الباحث الإيطالى جوليو ريجينى، حاول المصريون التفكير خارج الصندوق للخروج «زى الشعرة من العجينة» من الأزمة الشائكة بين البلدين مع تعثر الحلول الدبلوماسية على المستويين المصرى والإيطالى.
محمد سليم يرى أنه يمتلك الحل الأمثل لإنهاء أزمة «ريجينى» بمنح الجنسية المصرية للباحث بأثر رجعى، ويعلن المسئولون حينها أن «ريجينى» مواطن مصرى وليس من حق الحكومة الإيطالية التدخل بين أبناء البلد الواحد: «الموضوع سهل مش محتاج فذلكة وسحب سفير» قالها «سليم» بسخرية. «إيطاليا سحبت سفيرها من مصر للضغط علينا طب ما إحنا كمان نقدر نسحب أى حاجة من عندها مفيش حد أحسن من حد»، تقولها سارة هشام، مطالبة بسحب اللاعب محمد صلاح، المحترف فى صفوف روما، للضغط على إيطاليا فى موقفها ضد مصر.
تهديد الجانب الإيطالى بمقاطعة البيتزا، هو الحل الذى رجحته «سلمى يسرى»، وبالتالى ستواجه روما خسائر فادحة، حيث إن الشعب المصرى «أكيل» بطبعه: «إحنا نخسرهم ومانشتريش بيتزا، ولا ناكلها، وبكده هاينشغلوا بخسارتهم»، موضحة أن اختيار الشاب الإيطالى لمصر لعمل أبحاثه بها كان خطأ من الأساس، وأنه يستحق ما حدث له، ويجب تجاهل الموضوع كما يحدث فى أغلب القضايا.
أما هشام شفيق، فيطالب بسحب السفير المصرى من روما اعتراضاً على اختفاء الشاب المصرى محمد معوض منذ قرابة الـ6 أشهر، وبذلك تضغط مصر هى الأخرى وتتساوى الكفتان: «واحدة بواحدة بقى إحنا كمان عاوزين نعرف معوض فين، وهنطالب بسحب السفير.. لو عندهم سفير إحنا كمان عندنا سفير».
المحامى يسرى محمد كان له رأى مختلف: «إحنا عشان نحل الموضوع ده نطلق اسمه على نوع مكرونة تيمناً به وخلاص، وكده يبقى حظى بتكريم زى الفل».
0 التعليقات لــ "حلول ساخرة لأزمة «ريجينى»: إحنا نقاطع البيتزا.. ونسحب محمد صلاح"